Föstudagur 27. janúar 2012

Ákvörðun hefur verið tekin í samráði við félagsforingja að fresta félagsútilegunni að Úlfljótsvatni.

Meginástæðan er óöryggi á vegum, óvissa um færð og komandi veðurhamur. Á þessu augnabliki eru allar leiðir lokaðar úr Reykjavík og munu verða um óákveðinn tíma, þótt kannske rætist úr með Þrengslin í kvöld.
Auk þess er færðin slæm á vegum austur úr og í Grímsnesinu og miklar hálkur.
Einnig er vond veðurspá og að muni bætast í veður aðfararnótt sunnudags.

Það er ábyrgðarhluti að halda ferðinni til streitu, þótt hraustir skátar séu á ferð, drekaskátar, fálkaskátar, dróttskátar og róverskátar – stundum þarf meiri kjark til að hopa fyrir aðstæðum en að halda áfram.
Útilegunni er semsagt frestað fram í byrjun mars og verður nánar tilkkynnt síðar. Þeir sem þegar hafa greitt þátttökugjald fá að sjálfsögðu endurgreitt.

Nú er um að gera að láta skilaboðin berast.
Við skulum ekki svekkja okkur, – njótum helgarinnar.

Landnemar.

Skráð í Starfið, Útilegur | Engar athugasemdir »

Föstudagur 20. janúar 2012

Helgina 27. – 29. janúar ætlum við Landnemar að fara í félagsútilegu á Úlfljótsvatni. Mæting er niðrí skátaheimili klukkan 19:30 á föstudaginn og áætluð heimkoma er á sunnudaginn um klukkan 16:00.

Útilegan er fyrir alla krakka í félaginu og kostar 8.000 kr. á mann ( Ef fleiri en 30 skrá sig náum við að lækka verðið niður í 7000 kr.). Innifalið í því verði er: Matur alla helgina ( heitur kvöld- og hádegismatur ásamt morgunmat, kaffi, og kvöldsnarli ), rúta báðar leiðir, gisting ásamt allri aðstöðu sem Úlfljótsvatn hefur uppá að bjóða.

Ef þú ætlar að koma þarf að skrá sig með því að senda póst á

karibrynjarsson@gmail.com  Í póstinum þarf að vera nafn skáta og hvaða sveit hann starfar í.

Við minnum alla foreldra á foreldrafundinn sem verður haldinn miðvikudaginn 25.jan klukkan 20:00 þar sem við munum segja frá helstu atriðum ferðarinnar og einnig munum við svara spurningum sem brenna a vörum ykkar. Fundurinn er aðalega hugsaður fyrir foreldra en að sjálfsögðu geta skátarnir komið með og ef foreldrar komast ekki er gott að skátinn mæti.

Vonumst til að sjá sem flesta

Hér má finna útbúnaðarlista, en einnig verður honum dreift á foreldrafundinum

Skráð í Starfið | Engar athugasemdir »

Sunnudagur 8. janúar 2012

Nú fara fundir að hefjast að nýju eftir jólafríið. Fundirnir eru á sama tíma og áður, eða eins og sést á myndinni hér fyrir neðan. Fundirnir byrja í næstu viku ( 9.-13. jan )

Svo næsta mánudag verður haldið uppá afmæli Landnema og að sjálfsögðu er öllum Landnemum boðið þangað. Afmælið byrjar klukkan 17:00 og er í einn og hálfan tíma. Þetta verður í rólegri kantinum og boðið verður uppá kakó og farið í nokkara vel valda leiki.

Skráð í Starfið | Lokað fyrir athugasemdir

Þriðjudagur 13. desember 2011

Skráð í Starfið | Lokað fyrir athugasemdir

Þriðjudagur 1. nóvember 2011

Núna um síðustu helgi fóru tæplega 30 Landnemar í félagsútilegu í Ölveri. Ferðin gekk mjög vel og ekki var annað að sjá en að allir færu heim með bors á vör. Flokkarnir völdu sér dagskrá fyrir útileguna og meðal dagskráliða sem voru í boði var kistugerð, fánagerð, undirbúningur fyrir hátíðarkvöldverð, fjársjóðsleit og tónlistarpóstur. Flokkurinn Fenrisúlfar í sveitnni Sleipni voru meðal þáttakenda á tónslistarpóstinum. Þeir skiluðu af sér þessu frábæra lagi sem heitir “Fenrisúlfar feat. ÞossiPow” þar sem skátaforinginn þeirra, Þorsteinn, rappar meðal annars skátaheitið. Lagið naut mikilla vinsælda í félagsútilegunni og hér viljum við leyfa ykkur sem heima sitjið að njóta þess líka.

Takk fyrir góða útilegu!

Fenrisúlfar feat. ÞossiPow

Hvert sem ég fer,

sé ég bara skáta.

kveikja eld og

Tjalda tjöldum.

Við lærum á prímus og

súrrum líka,

heitum Fenrisúlfar og

það er okkar klíka

Ekki er allt eins og er,

ég kveiki eld eins og

Vera ber.

Ég lofa að gera það sem í mínu valdi stendur til þess;

að gera skyldu mína við Guð og ættjörðina

að hjálpa öðrum og

að halda skátalögin

VINÁTTA

SAMSTAÐA

GÖMUL GILDI OG

BÆTT SAMFÉLAG

Lag: Kristinn Arnar

Texti:  Fenrisúlfar

Skráð í Starfið | Lokað fyrir athugasemdir

Mánudagur 24. október 2011

Skráning í útileguna er enn í fullum gangi og fer hún fram hér. Skráningu lýkur 27. október.

Frekari upplýsingar er að finna hér fyrir neðan.

Skráð í Starfið | Lokað fyrir athugasemdir

Miðvikudagur 19. október 2011

Félagsútilega Landnema verður haldin í Ölveri daganna 28. til 30. október næstkomandi. Þema útilegunnar verður í ævintýri með sjóræningjum og verður það fléttað inn í alla dagskrána. Mæting er í skátaheimilið klukkan 18:30 á föstudaginn og áætluð heimkoma á sunnudaginn er klukkan 16:30. Þátttökugjald fyrir skáta er 8.000* krónur og er matur, rútuferð, gisting og öll dagskrá innifalinn í því verði.

Skráning í útileguna fer fram hér á síðunni og þarf að skrá sig í síðasta lagi 27. október. Að þessu sinni verður ekki haldinn sérstakur foreldrafundur fyrir útileguna vegna þess að mætingin á þá hefur verið í slakari kantinum. Þess í stað er reitur í skráningaforminu þar sem þið getið sent okkur spurningar um útileguna og við svörum ykkur um hæl.

Hér er útbúnaðarlisti sem gott er að hafa til viðmiðunar fyrir útileguna. Við viljum biðja ykkur um að virða það að skátarnir eiga ekki að koma með nammi, gos, síma eða tólistaspilara í útileguna.

* 5.000 kr. fyrir starfandi foringja.

Skráð í Starfið | Lokað fyrir athugasemdir

Miðvikudagur 28. september 2011

Kæru Landnemar.
Vinur okkar Bergur Jónsson lést á Landakotsspítala í morgun eftir erfið veikindi.
Bergur var fæddur 16. apríl 1934. Hann var einn af stofnendum Landnema árið 1950 og sveitarforingi. Hann var einnig félagsforingi um skeið.
Bergur var góður félagi, mikill stuðningsmaður Landnema og vinur alla tíð.

Útför Bergs Jónssonar verður í Bústaðakirkju þriðjudaginn 11. október n.k. og hefst athöfnin kl. 13.
Landnemar munu standa heiðursvörð og aðstoða við útförina.

Skráð í Starfið | Lokað fyrir athugasemdir

Þriðjudagur 27. september 2011

Dróttskátasvetin Víkingar ætlar núna um helgina 30. september til 2. október að skella sér í útilegu.

Ferðinni er haldið í Hverahlíð, skála í eigu skátafélagsins Hraunbúa. Skálinn er staðsettur sunnan Kleifarvatns á Reykjanesi.

Áætlaður kostnaður er 3500 kr og er í því innifalið skálagjald, dagskráefni og kvöldmatur á laugardegi.

Skátarnir þurfa að hafa allar aðrar máltíðir með sér og eru sérstaklega minntir á að taka með sér sundföt og handklæði. Einnig þurfum við að biðja alla að taka með sér 2 l af vatni vegna þess að það er ekki rennandi vatn í skálanum.

Við leitum að foreldrum sem eru reiðubúnir í að keyra og/eða sækja skátana í skálann. Annars þurfum við að útvega rútu og hækka kostnað.
Því eru foreldrar beðnir um að láta vita í síðasta lagi 29. september.

Mæting er í skátaheimilið 19:30 og við leggjum af stað upp úr því. Áætlað er að leggja af stað úr skálanum 14:00 á sunnudegi

Vegurinn á að vera fær á þessum árstíma og samkvæmt mínum upplýsingum ágætur fyrir alla bíla. Hér fyrir neðan má finna upplýsingar um hvernig
komist er að skálanum.

Akstur:

Keyrt er frá Hafnarfirði í gegnum Helluhverfið og í átt að Vatnsgarðsnámum. Þaðan er haldið áfram og keyrt á vegi 42 vestan við Kleifarvatn. Vegurinn er ekki fær allan ársins hring og því er gott að skoða værð á vegum hjá Vegagerðinni. Þegar komið er að enda Kleifarvatns er beygt vinstri við blátt skilti sem á stendur ‘Hverahlíð’.

GPS hnit: N63 54.273 W22 00.986

Við vonumst til að sjá sem flesta.
Hulda Tómasdóttir og Sigurgeir B. Þórisson
Sveitarforingjar Víkinga

Skráð í Starfið | Lokað fyrir athugasemdir

Miðvikudagur 21. september 2011

Háahlíð 9, félags- og skátaheimili Landnema lifnar við, starfið er að hefjast. Öll gerum við væntingar til vetrarins. Mörg andlit sjást frá síðasta ári og fyrri árum ásamt mörgum nýjum. Gott skátasumar að baki með Landnemamótið í Viðey og Alheimsmótið, Jamboree í Sviþjóð sem hápunkta.

Nýir krakkar eru velkomnir og auðvitað allir þeir sem áður voru í skátastarfinu. Stundum er sagt að í skátahreyfingunni séu ekki til varamannabekkir, skátahreyfingin sé þátttakendahreyfing, ekki áhorfendahreyfing. Allir krakkar finni sér farveg innan þeirra ramma sem settir eru.

Starfið er aldursskipt; 7 – 9 ára köllum við Drekaskáta, 10 – 12 ára eru Fálkaskátar, 13 – 15 eru Dróttskátar, 16 – 18 eru Rekkaskátar og Róverskátar eru svo 19 – 22 ára. Viðfangsefnin eru sniðin að ólíkum aldri.

Sjáið hér á heimasíðunni frekari upplýsingar um innritun og félagsgjald.

Skráð í Starfið | Lokað fyrir athugasemdir