Hertar aðgerðir almannavarna

Kæru foreldrar og forráðamenn

Vegna neyðarástands almannavarna hefur stjórn Landnema ákveðið að vinna úr tilmælum Bandalags íslenskra skáta vegna Covid-19 faraldursins.

Skátafundir hjá dreka, fálka og dróttskátum verða að mestu haldnir utandyra með lítilli snertingu við skátaheimilið næstu tvær vikurnar. Foringjum ber að nota andlitsgrímur.

Við viljum biðja ykkur að aðstoða okkur í því að passa uppá eftirfarandi hluti:
• Að senda skátann ekki á skátafund með minnstu kvefeinkenni.
• Að minna skátann á persónubundnar sóttvarnir, þvo sér um hendur við komu í skátaheimili.
• Að gæta þess að þið séuð ekki viðstödd skátafundi og komið ekki inn í skátaheimilið.

Við bendum á Stuðkví verkefnin hér ef skátarnir eru heima, eða vantar skemmtileg verkefni til þess að vinna að.

Ef það eruð með einhverjar spurningar eða ábendingar endilega hafið samband á landnemi@landnemi.is.


Nýjung! Fjölskylduskátar

Stofn- og hugmyndafundur

Nýjung! Fjölskylduskátasveit fyrir foreldra og börn
– Átt þú barn á aldrinum 4 – 7 ára sem langar að taka þátt í skátastarfi?
– Ert þú til í að taka þátt í fjölskylduskátasveit þar sem foreldrar og börn koma saman?
– Ævintýralegir fjölskylduskátafundir úti og inni einu sinni í mánuði eru í bígerð.
– Kynningafundur þar sem hugmyndir fá að fljúga, verður haldinn í skátaheimili Landnema við Háuhlíð, kl. 11 sunnudaginn 8. nóvember.

Skráðu þig á fundinn hér.

Nánari upplýsingar gefur Ragna á netfanginu ragnarogn@gmail.com

Við hlökkum til að sjá ykkur.
Hulda, Inga, Ragna og Siggi

Fjölskylduskátastarf nágranna okkar í Skjöldungum var nýlega tilnefnt til foreldraverðlauna Heimilis og skóla.

Dagsferð drekaskáta

Ágætu foreldrar og forráðamenn

Fyrsta dagsferð drekaskátasveitarinnar Huginn og Muninn, verður laugardaginn 3. október 2020. Mæting er í skátaheimilið, Háuhlíð 9, kl. 10:00. Við munum taka strætó á útivistarsvæðið í Gufunesbæ og fara í dagskrá þar. Áætluð heimkoma til baka í skátaheimilið er klukkan 15:30.

Dagskrá dagsferðarinnar er fyrst og fremst að vígja þá sem eru nýir inn í skátahreyfinguna. Þeir munu því fá skátaklút og drekaskátamerki til að setja aftan á klútinn. Þeir sem eru nú þegar vígðir fá nýtt drekaskátamerki.

Mikilvægt er að skátarnir komi vel klæddir til útiveru og með nesti. Við munum bjóða upp á grillaðar pylsur í hádegismat, svo ef það eru einhverjir sem eru grænmetisætur eða með ofnæmi/óþol þá endilega látið okkur vita.

Ferðin er innifalin í félagsgjaldi félagsins og því er ekki sérstakt gjald í ferðina en skilyrði fyrir þátttöku er að félagsgjöld séu í skilum. Sjá upplýsingar um 
félagsgjöld á heimasíðu félagsins: https://www.landnemi.is/starf/felagsgjald/.
Skráning í félagið og í dagsferðina fer fram á Sportabler.

Hlökkum til að sjá ykkur!
Drekaskátaforingjar

Landnemar óska eftir starfsmanni

Skátafélagið Landnemar óskar eftir öflugum einstaklingi í krefjandi og skemmtilegt starf starfsmanns skátafélagins. Skátafélagið er með fjölbreytt og spennandi starf fyrir börn á aldrinum 8-25 ára. Við leitum að einstaklingi sem er skapandi, sjálfstæður, skipulagður og sniðugur.

Helstu verkefni:

  • Halda utan um skráningar
  • Sjá um tölvupóst og halda utan um samskipti við foreldra
  • Vera stuðningur við foringja
  • Viðvera á fundatímum
  • Annast innkaup

Hæfniskröfur:

  • Vera með bílpróf
  • Almenn tölvukunnátta
  • Skipulagshæfni og sjálfstæði í vinnubrögðum
  • Reynsla af stjórnun og mannaforráðum er kostur
  • Reynsla af skátastarfi eða öðru æskulýðsstarfi er mikill kostur

Aðrar kröfur:

  • Hreint sakavottorð

Frekari upplýsingar veitir Arnlaugur Guðmundsson, félagsforingi skátafélagsins á felagsforingi@landnemi.is, s. 6474746

Umsóknir skulu berast á landnemi@landnemi.is. Umsóknarfrestur er til 15. september 2020.

Landnemar: Skátastarfið fer af stað 8.-10. september

Kæru skátar í Landnemum, við hefjum starfið 8.-10. september og hlökkum til að sjá ykkur þá á fyrstu skátafundum vetrarins.

Fundartímar verða óbreyttir frá því í fyrra:
– Drekaskátar (2-4 bekkur): Miðvikudagar 17:30-18:45
– Fálkaskátar (5.-7. bekkur): Þriðjudagar 17:20-19:00
– Dróttskátar (8.-10. bekkur): Fimmtudagar kl. 17:45-19:45
– Rekka- og róverskátar (16-25 ára) ákveða sinn fundartíma.

Það verður gaman að sjá nýja og reyndari skáta með í ævintýrum vetrarins. Á næstu mánuðum er fjöldi viðburða á dagskránni s.s. sveitarútilegur, félagsútilega, vetrarskátamót, og næsta sumar drekaskátamót, Landnemamót, landsmót skáta sem er stórkostleg upplifun og margt fleira er á döfinni í vetur.

Sjáumst í skátaheimilinu Háuhlíð 9.

Skráning fer fram í Sportabler: https://www.sportabler.com/shop/Landnemar

Endilega deilið sem víðast!

Pollanámskeið útilífsskólans

Útilífsskólinn býður upp á eitt pollanámskeið fyrir 5 og 6 ára í sumar vikuna 27. – 31. júlí.

Námskeiðið er ekki jafn krefjandi og þau sem eru fyrir eldri krakkana en við förum mikið út og þetta verður rosalega gaman!

Skráning fer fram inn á: https://sportabler.com/shop/landnemar

Ef einhverjar spurningar vakna ekki hika við að hafa á facebook https://www.facebook.com/Landnemi eða með því að senda okkur línu á utilifsskoli@landnemi.is.

Við minnum líka á að það eru ennþá laus pláss á námskeið fyrir 8-12 ára í júlí!

Foringjaferð

Foringjahópur Landnema hélt í ævintýraferð um síðustu helgi í boði Landnema sem þakklætisvott fyrir óeigingjörn sjálfboðaliðastörf síðastliðinn vetur en allir foringjar Landnema starfa sem sjálfboðaliðar. Ferðinni var heitið á suðurlandið þar sem margar helstu náttúruperlur við þjóðveginn voru skoðaðar í óvenjulegu fámenni. Gist var í Skaftafelli þar sem gengið var á Svínafellsjökul og upp að Svartafossi. Frábær ferð í alla staði með frábæru fólki!

Sumarstarf

Í júní verður opið hús fyrir alla skáta félagsins á þriðjudögum milli klukkan 17:30 og 19. Upplýsingar um dagskrá hvers fundar verða sendar í gegnum Sportabler.

Sunnudaginn 14. júní verður dagsferð fyrir alla skáta félagsins og helgina 3. – 5. júlí förum við í útilegu á Úlfljótsvatn.