Eftirfarandi skilaboð voru send foreldrum og forráðamönnum 
föstdaginn 20. mars 2020:

Ágætu foreldrar og forráðamenn.

Fyrr í dag gaf mennta- og menningarmálaráðuneytið út 
leiðbeinandi viðmið um íþrótta- og æskulýðsstarf í ljósi 
takmörkunar á skólastarfi og samkomum. Þar er mælst til 
þess að hlé verði gert á íþrótta- og æskulýðsstarfi þar til 
takmörkun á skólastarfi lýkur. Skátahreyfingin verður að 
sjálfsögðu við þessum tilmælum og fellir niður allt skátastarf 
þar til annað verður ákveðið.

Stjórn og foringjar skátafélagsins Landnema minna á lífsgildi
skátarhreyfingarinnar sem geta komið að góðum notum við að mæta
óvæntum og erfiðum aðstæðum en þau eru: 
  Skáti er hjálpsamur; 
  skáti er glaðvær; 
  skáti er traustur; 
  skáti er náttúruvinur; 
  skáti er tillitssamur; 
  skáti er heiðarlegur; 
  skáti er samvinnufús; 
  skáti er nýtinn; 
  skáti er réttsýnn; 
  skáti er sjálfstæður.

Þá hvetjum við alla skáta til að taka þátt verkefnum
skátahreyfingarinnar undir merkinu #stuðkví. 
Ný verkefni eru sett inn á hverjum degi meðan að þetta 
ástand varir. 
Verkefnin má finna hér: 
www.skatarnir.is/studkvi

Við hlökkum til að sjá alla skátana aftur þegar aðstæður 
leyfa. Enn er stefnt að því að halda landsmót í sumar og við 
munum hefja undirbúning af krafti þegar við hittumst á ný.

Okkar bestu kveðjur til ykkar allra,
stjórn og foringjar Landnema

Framhaldsaðalfundurinn var haldinn skv. áætlun þann 18. mars. Boðið var upp á að þátttakendur mættu á staðinn eða tækju þátt með símafundi. Fundurinn var frekar fámennur sem ekki er undarlegt og tóku nokkrir þátt með símasambandi.

Tvö mál voru á dagskrá: Kosning eins manns í stjórn og eins í uppstillinganefnd. Var sjálfkjörið í báðar stöðurnar. Hulda María Valgeirsdóttir var kjörin í stjórn og mun taka við stöðu aðstoðarfélagsforingja hinn 1. ágúst n.k. Sigurgeir Bjartur Þórisson var kjörinn í uppstillinganefnd.

Undir liðnum önnur mál var m.a. fjallað um frestun skátaþings og aðalfundar SSR.

Aðalfundur Landnema 2020 var haldinn í Háuhlíð 9 miðvikudaginn 19. febrúar kl. 20. Félagsforingi flutti skýrslu stjórnar fyrir starfsárið 1.9.2018 til 31.8.2019. Gjaldkeri kynnti skoðaða reikninga félagsins fyrir starfsárið og voru þeir samþykktir. Gerðar voru breytingar á 9. grein laga félagsins, en hún er um verkaskiptingu stjórnar. Breytingin var gerð til þess að skýra hvaða stjórnarmaður færi með hvaða hlutverk í félagaþrenning-unni sem BÍS leggur áherslu á núna. Lögin, eins og þau voru samþykkt, má finna hér á síðunni undir flipanum Um félagið og þar undir Skipulag félagsins.

Þegar kom að kosningum vantað eitt framboð í stjórn og einnig fulltrúa í uppstillinga-nefnd. Var ákveðið að fresta þessum kosningum til framhaldsaðalfundar sem ákveðið var að halda að fjórum vikum liðnum, miðvikudaginn 18. mars kl. 20.

Undir liðnum önnur mál benti Sigurður Viktor Úlfarsson á að aðalfundartíminn væri ekki heppilegur þar sem meira en 5 og 1/2 mánuður er liðnn síðan starfsárinu lauk. Hann benti á að e.t.v. væri heppilegra að halda aðalfundinn í nóbember sama ár og starfsári lýkur frekar en svona seint.

Fundarstjóri var Sigrún Sigurgestsdóttir og fundarritari var Sigurbjörg Sæmundsdóttir. Fundargerðin er aðgengileg fyrir alla foringja Landnema. Gestir fundarins voru Ásgerður Magnúsdóttir f.h. BÍS og Sigurbjörg Sæmundsdóttir f.h. SSR.

Aðalfundur skátafélagsins Landnema verður miðvikudaginn 19. febrúar klukkan 20 í skátaheimilinu. Aðalfundarboð var sent út til allra félaga 15 ára og eldri 4. febrúar síðastliðinn.

Foreldrafundur vegna Landsmóts skáta verður í skátaheimilinu

Mánudaginn 10. febrúar klukkan 20

Landsmót skáta fer fram 8. – 14. júlí næstkomandi að Hömrum á Akureyri. Þangað fjölmenna Landnemar eins og aðrir skátar innlendir og erlendir. Mótið er fyrir alla skáta fædda 2012 og fyrr og er drekaskátum nú í fyrsta skipti boðið að taka fullan þátt í mótinu. Heimasíða mótsins er www.skatamot.is

Á fundinum verður farið yfir fyrirkomulag mótsins, skráningu, verð, fjölskyldubúðir, fjáraflanir og annað. Rétt er að taka fram að börnin eru á ábyrgð foringja skátafélagsins á meðan á mótinu stendur og því er ekki þörf á því að foreldrar fylgi börnum sínum á mótið. Hins vegar eru starfræktar sérstakar fjölskyldubúðir þar sem foreldrar og systkini geta komið og dvalið um lengri eða skemmri tíma og tekið þátt í dagskrá mótsins.

Einnig óskum við eftir foreldrum sem eru tilbúnir að ganga til liðs við foringja félagsins í fararstjórn á mótið. Verkefni fararstjórnar eru meðal annars að halda utan um fjáraflanir fyrir mótið, undirbúa og pakka búnaði félagsins, reisa tjaldbúð, sjá um velferð skátanna á mótinu og skipuleggja matseld auk þess að sinna frágangi eftir mótið. Mögulegt er að taka að sér ákveðin takmörkuð verkefni.

Vonumst til að sjá sem flesta!

Öllum Landnemum, fjölskyldum þeirra og velunnurum er boðið í 70 ára afmæli Landnema 9. janúar milli klukkan 17 og 19 í skátaheimilinu. Boðið verður upp á afmælisratleik og afmælisveitingar. (Ratleikurinn verður að hluta úti á lóð skátaheimilisins – og því gott að koma með útiföt.)

Jólafundur Landnema verður þriðjudaginn 17. desember milli 17:30 og 18:30. Þangað er öllum skátum félagsins boðið og er það jafnframt síðasti fundur fyrir jól.

Nýtt ár hefst svo með opnu húsi fyrir alla skáta þriðjudaginn 7. janúar milli klukkan 17 og 19 þar sem 70 ára afmæli Landnema verður undirbúið.

Fimmtudagurinn 9. janúar er afmælisdagur Landnema og að þessu sinni fagnar félagið 70 árum. Afmælisfagnaður verður í skátaheimilinu milli 17 og 19 og boðið verður upp á afmælisratleik og afmælisveitingar. Skátum í félaginu og fjölskyldum þeirra er boðið að samfagna með okkur.

Takk fyrir samstarfið á árinu!

Við óskum ykkur gleðilegra jóla og farsældar á nýju ári!

Við hlökkum til að sjá ykkur í félagsútilegu í kvöld!
Vegna vindaspár í kvöld er rétt að taka fram að mæting er í Háuhlíðina klukkan 19:30. Ef til þess kæmi að mat okkar í samstarfi við bílstjóra hópferðarfyrirtækisins væri að ekki sé óhætt að keyra Kjalarnesið í kvöld þá verður gist í skátaheimilinu í nótt og haldið í Skorradal í fyrramálið.

Félagsútilega verður í Skátafell í Skorradal 8. -10. nóvember. Upplýsingar hafa verið sendar út í tölvupósti. Eldri skátar fá tækifæri til að prófa vetrargistingu í tjaldi.

Hvað er þetta skátastarf? Kynning á skátastarfinu fyrir foreldra verður í skátaheimlinu 23. október milli klukkan 20 og 21. Vonumst til að sjá sem flesta!